Бэй Аэриагийн Монголчуудын Хөлбөмбөгийн Зөвлөлөөс (БАМХЗ) Монголын хөлбөмбөгийн холбооны 50 жилийн ойн зориулан зохион байгуулсан тэмцээн өнгөрсөн Ням гарагт өндөрлөлөө. Шигшээ тоглолтонд шалгаран үлдсэн Темескал Рейдерс, Хийморь багууд аваргын цомын төлөө хүч тэнцүү өрсөлдөв. Хоёр баг үндсэн цагтаа гоол оруулж чадаагүй тул өмнө тогтсон дүрмийн дагуу торгуулийн цохилтоос хожлыг шийдэх үед Г.Энх-Амгалан ахлагчтай Темескал Рейдерс багийн тоглогч, хаалагч нар онвчтой бас одтой байж аваргын цом, алтан медалыг анх удаагаа хүртлээ.

Хүрэл медалын төлөө тоглолт Таван Цагариг Хүлэг багуудын хооронд болж ширүүн өрсөлдөснөөс хүчтэй + туршлагатай + мастеруудтай аварга багыг Хүлэг морьд мэт шижигнэсэн залуучууд 4:2 харьцаагаар илүүрхэн хожиж 3-р байр эзлэв. Тэмцээнд нийтдээ 7 баг оролцон тоглосноос:

4-р байрт Таван Цагариг
5-р байрт Андууд
6-р байрт Гарьд
7-р байрт Отгон-Од багууд тус тус шалгарчээ.  

Бэй Аэриагийн монголчуудын хөлбөмбөгийн лигийн хошой аварга, цомын болон нэрэмжит тэмцээний удаа дараагийн аварга Таван Цагариг баг энэ удаа энгэртээ зүүх медалгүй хоцорсон нь нийт баг тамирчдын ур чадвар сэргэн дээшлэж аль ч багтай эн тэнцүү өрсөлдөх хэмжээнд хүрснийг харуулж байна. Монголын хөлбөмбөгийн холбооноос БАМХЗ-ийн ажлыг урамшуулан дэмжиж баяр хүргээд талархалын диплом илгээжээ. Мөн тэмцээнд оролцогч баг тамирчдын зүгээс цас зуданд нэрвэгдсэн малчиддаа туслах хөдөлгөөнийг дэмжин хандив цуглуулж тус аяныг зохион байгуулж байгаа Д.Мөнхбатад гардууллаа. Ийнхүү зүсрэн орсон бороог ч үл ажран зогсох үнэнч хөгжөөн дэмжигчидтэй нэгэн тэмцээн тун сонирхолтой болж өнгөрөв.