Zamdaan

Д.Батсүх: Говийн нууц (41, 42, 43, 44-р бүлэг)

Details

Category: Уран зохиол

Published on Thursday, 10 January 2013 21:20

Written by Цэрэндорж

Hits: 688

41. Бетти

Бетти тэмдэглэлийг уншиж дуусаад энэ түүх үнэн болов уу хэмээн эргэлзэв

Бетти тэмдэглэлийн дэвтрийн сүүлчийн хуудсыг хүртэл уншиж дуусгаад цонхоор гадагш харвал үүр цайх дөхжээ. Хачирхалтай нь зуу гаруй жилийн тэртээх Монгол оронд судалгаа хийхээр ирсэн эрдэм шинжилгээний ангийнханд юу тохиолдсон талаар үргэлжлүүлэн өгүүлсэн байх учиртай арын хэдэн хуудас нь алга байлаа.

Хэн тэдгээр хуудсуудыг ямар санаатайгаар тайрч авсан болоод одоо хаа нэгтээ хадгалагдаж байгаа юу эсвэл үрэгдэж алга болсон уу гэдгийг мэдэх аргагүй болсон тул бүсгүй бачимдан сууснаа өндийж кофе уухаар галын өрөөнд оров.

Дэвтэрт бичигдсэн тэр явдал үнэн юм болов уу? Тун гайхалтай сонин түүх байна шүү. Сюзан бүсгүйн хувь заяа юу болсныг мэдэх юмсан. Ричард, Сюзан хоёр хэн хэндээ үнэхээр их дурласан байж дээ. Тэд хожим хаа нэгтээ дахин уулзсан болов уу? хэмээн тэр амандаа бувтнаж байв.

Бетти өглөөний ундаа ууж дуусгаад байнга хөтөлж хэвшсэн дадлаараа өөрийнхөө тэмдэглэлийн дэвтрийг нээж энэхүү гайхалтай түүхийг уншсан талаараа товч бичээд төгсгөлд нь, “Жич: Энэ явдлын үнэн худлыг тодруулах! Америкт очихдоо Ричардын удмынханыг заавал хайж олж уулзах!” хэмээн тэмдэглэв.

Шөнөжин нойргүй уншиж суугаагаараа хоносон бүсгүй амрахаар шийдээд орондоо орохдоо “Хурдан өдөр болоосой... Должин гуайгаас асуух зүйл их байна даа...

Би яагаад Сюзантай төстэй байдаг билээ... Надад яагаад түүнийхтэй ижил зүүлт байгаа юм бол?... Энэ зүүлтийг аав минь надад өгсөн болохоор тэр зарим нэгэн зүйлийг мэддэг байх учиртай... Аавд и-мэйл бичиж лавлах хэрэгтэй юм байна... ” гэх мэтийн олон асуулт, таамаглалыг урд хойно нь оруулан эрэгцүүлж хэвтээд нойрондоо дийлджээ.

Уяхан Замбуу Наран Дор

Details

Category: Уран зохиол

Published on Wednesday, 02 January 2013 08:08

Written by Цэрэндорж

Hits: 369

Шинэ оны гэрэлт наран харанхуйг түлхэн мандлаа. Тэнгэр цэв цэлмэг, салхи тогтуун, агаар цэнгэг ч тас хийсэн жаварлаг, модны мөчирт тогтсон цасан бургиж хацарт наалдан үл мэдэг чийг даан сарнина. Илч гэрлийн илбэлт, өвлийн үнсэлт мэт ээ.

Гэрэл гэгээ, дуу чимээ амьдралын эхлэл ажгуу. Наран дор нүдээ нээхгүй хичнээн хором болох бол. Нүд нээгдэхгүй тусам бодит дуу чимээн хөг алдран, төсөөлөл, зүүд, мөч өнгөрөх бүрт айдас, түгшүүр, харанхуй нөмрөх амой.

Үрийн бүүвэй аялан суугаа бүсгүйн харц, ээжийнхээ хөхийг хаяа шов хийтэл сорчихоод, үнэгчлэн нойрсох хүүхдийн царай бурханы мэт амирлангуй, амгалан байхыг, гэзэг үсээ задгай тавьсан баясгалант бүсгүй зөрөн өнгөрөхийг, анхны болзоондоо ирсэн охины хацарт ичингүйрэхийн шунх улсхийхийг, шувууд тэнгэрт

элэн халин нисэхийг, морьтон газар бөмбөрдөн наашлан ирэхийг, монгол эр засуулынхаа гараас сугаран дэвэн дэвсээр зүлэг ногоон дэвжээнээ барилдахаар гарахыг, Алтайн уулсын дээгүүр нүүгэлтсэн үүлнээс хур асгарч, солонго татан арилахыг гагц гэрэлт нарны дор үзэж баясмуу.

Алс мордох, айлчлан ирэх нэгнээ үдэх, угтахын ай, амь дүйж зорьсондоо хүрэхийн ай, уйлан ирэх, энгэр түшин буцахийн баяр гунигт ай, олж төрсөн, онож шингэх эх оронтойн айг үнэнхүү гэрэлт наран дор мэдэрмүү.

Хүний харцанд яахаараа тийм их гуниг хурдаг болохыг, хүмүүс зовлон дааж, жаргал эс даахын эсэргэцлийг, хувь заяаны зураг сэтгэлээс төрөхүйн үнэн худлыг, хамар сөхсөн дэврүүн, нусаа гоожуулсан дорой нэг гудамжаар зэргэцэн ахлах, салахгүй юм шиг хайраар учраад учрахгүй юм шиг дайжин холдохыг хорвоогийн наран дор олж хармуу.

Гэрэлт нарнаас тэтгэгдсэн түм түмэн, сая живаа амьтан бөөрөнхий цэнхэр дэлхийд найрсан амьдардаг. Тэдний нэгээхэн бүл Монголчууд уяхан замбуу тивийн наран энэхэн дэлхий даяарыг алгасалгүй мандан гийхийн ерөөлийг дотоод эрчим хүчнийхээ гүнээс ундаруулан уртаас урт, цээлийн цээл аялгуугаар дуулдаг түмний үрс билээ.

Тийм ээ. Бидний сэтгэлд нарнаас асаасан гал бадамлаж, аз жаргалын ундрага болдог. Хүүхэд, хөгшид, ойр дотно, гэр бүлийнхэн, түмэн олон гэрэл гэгээнд нь жаргаж, унасан газар, эх орон, буурал дэлхий элч дулаанд нь бүлээцэх сэтгэлийн галд чинь эрч хүч, итгэл баярын цучил нэмэрлэе.

Уяхан замбуу тивийн шинэ оны наран мандлаа.

Д.Бишүүгарам
Чикаго хотоос
2013.1.01

Орчлон хорвоогийн амьд бүхнийг тэтгэсэн өглөөний улаан нарнаар шинэ оны эхний өдрийг өнгөлөн бадамлуулж билэгдэлтэй сайхан бичлэг илгээсэн Бишүүгарамдаа баярлалаа! Ахуй амьдрал ажил үйлс амжилт бүтээлээр дэлгэрч асралт нарны алтан шаргал туяан доор амгалан тайван суухын ерөөл дэвшүүлэе!